Ewòl Sen-Lwi

Azil mwen se tchala tout sezon lavi ak odasite egzil , matla m se rezidans dlo je tout branch chive m bay vizyon m itinerè nostalji m prèskil zile m egzile…   nan bag fiyansay mwen ak egzil solitid sòsò rèv mwen fè chankray m afiche bandwèl temwanyaj mwen nan 4 kafou: • kafou mapou Danpis mapou kouche • kafou tenngendenng • kafou Mazi Dabòn zobop • kafou m pa fout fou... egzil bwè dlo je m nan krich siklòn drivayè nan nòs van nòde chalvire zile m ra sòl jodiya, m konprann pye bwa pat janm mizisyen solèy pat janm Jeneral adye konpè egzil! tout voum loray sou do m laye laye w ou mèt domine m malmennen m jan w pito adye konpè egzil! m deja pann somèy mwen depi 3 jou nan fil layilòn ak kafe mawon karavàn van m ap tann pou m al Lagonav   nan viwonn simityè koral zonbi monte ogatwa chante enkantasyon yewe yo anba zago loray kout kanno se pèpètmayi nan viwonn simityè, lafimen ansanswa fè bouya 2 goud bouji nwa 50 kòb bouji wouj simityè san lizay nan viwonn simityè, posesyon koukouy son kanbiz tèt san kò listwa dekrete chak jou se jou antèman m   lavi m se debobinaj tan an nan espas la, libera m son pope twèl ak epenng ti tèt…